RECIELLA CON BUEN COLOR por Iris Díaz Trancho

• A les muyeres qu’entovía nun nos llegó la maternidá danos la sensación que los neños y les neñes de rollu son, al marxen d’otres valoraciones más profundes, dalgo paecío a lo que pues topar na sección de «pequeño electrodoméstico» d’una gran superficie: maquinaries complexes, con ritmos, ritos y rutines preestablecides y siempre ensin manual d’instrucciones.

  La cantidá de productu que pues echar, la puesta en marcha y la potencia enerxética que soporta ye un universu siempre complexu que va traduciéndose a base de llibros, conseyos familiares o blogues como esti, nel que la esperiencia directa va faciendo un callu que tresforma les esplicaciones más difíciles n’exemplos bien prestosos.

  Con too, y volviendo al entamu, pa les muyeres ensin esperiencia incapaces siquiera de saber l’alfabetu, esi llibru d’instrucciones nun tien más llingua que’l mandarín o siacasu l’árabe; un montón de papeles nos que nun yes quien a saber per onde entamar a lleer.

  Tengo pa mí, por embargu, que si hubiera una versión n’asturianu del llibru d’instrucciones de la maternidá, l’asuntu de les condiciones metereolóxiques, comunmente conocíes como «el tiempu», ocuparía un llugar bien destacáu na sección «Enantes d’empezar» y mui especialmente en «Coses a tener en cuenta: familia y entornu».

  Bien sabemos que la probabilidá de lluvia n’Asturies ta penriba de la media española, d’ehí la composición vexetal, animal, l’arquitectura, el verde y tol restu cuestiones que nun vienen al casu por masuñaes. Lo que nun ta tan analizao ye hasta qué puntu incide la presión familiar y social sobre l’adaptación de les rutines de los padres y madres que tán d’estrenu cuando tamos falando de la lluvia, o meyor, de l’ausencia de la mesma. La posibilidá de facer una planificación selmanal en base a les apetencies o les necesidaes ye un auténticu despropósitu: equí el que manda de verdá sobre les vides de les families asturianes ye Maldonado.

  Nun puedo imaxiname’l castigu social que pue recaer sobre una familia que tome la decisión de: a) llevar a los neños al cine n’agostu y con sol, b) nun sacar al neñu o neña de rollu a pasear pel Muro si abre’l día una tarde de febreru, c) nun-y quitar los leotardos al rapacín si tien la más mínima posibilidá de recibir un rayín de sol. La rempuesta a estos casos del llibru d’instrucciones versión asturiana llevaría o bien a la sustitución de la acción por otru familiar (xeneralmente les güeles) o bien al reproche colectivu y machacón («¿cómo nun sacaste a la neña con esti día?»).

  Les espresiones «sacar», «tomar l’aire», y más patromonialmente «asoleyar», van arrastrándose como salmodies hasta que’l rapacín alcanza la edá adulta; y ye que, de mayorinos, tamién somos torturaos col cultu al sol, especialmente nes vacaciones.

  Asina ye que les muyeres qu’entovía nun fuimos madres, y sabemos bien poco del procesu de la maternidá, somos yá a entender, y cásique asumir, dalgún de los procesos que nos son propios por cultura, sociedá, clima, salú… eses instrucciones que faen que l’artefactu que se dispón a llegar a casa funcione, nun sé si meyor, pero sí «con munchu meyor color».

  Iris Díaz Trancho (maestra de llingua asturiana y autora de literatura infantil)